زيارة محافظ الطايف بالعام الماضي1424للمحاني - صقر زايد الفقيه الثعلي

القصيدة الثانيه للشيخ صقر بمناسبة
زيارة المحافظ الثانيه في العام 1424ه

بسم الله اللي كون الكون كله
بسمه يطير الطير بالجنحان

اللي رمى فرعون في غبة البحر
وفرعون عيا ينفعه هامان

يابن معمر مرحبا بوصولك
واللي يرافقكم من الشجعان

رؤساء الدواير كل واحد باسمه
عسى زيارتكم لها برهان

والشكر لله ثم نشكر ملوكنا
على الرخاء والامن والامان

نشكر حكومتنا ونشكرجهودهم
ونجازي الاحسان بالاحسان

وسايل التعليم انارت بلدنا
دعاة علم وحفظ للقران

ومكاتب للتوعيه والمساجد
ورواتب تصرف من الضمان

ومشايخ في كل ليلة تزورنا
تغضب بليس وترضي الرحمن

مشوا على سيرة نبيهم محمد
بتوجيه من فهد وعبداالله وسلطان

وعبد المجيد اللي مشيتوا بامره
هذاك له وسط القلوب مكان

الله يحفظه من صدوف الدنيا
ويكتب له التوفيق والغفران

يابن معمر يوم زرت المنطقه
ناظربعينك وافتح الاذان

المنطقه تحتاج مركز شرطه
حتى يتم الامن والامان

ساووا بنا رضوان والفيصليه
ودغيبجه والحفر مع مران

يابن معمر ما لقينا واسطه
ترجع مطالبنا بلا قبلان

عشرين عام ولا حصل مستشفى
مريضنا دايم وهو تعبان

والا الدراسه قررت حاجتنا
كثر العدد والبعد والسكان

شفت الطريق اللي بدون علامه
خطر على الشيبان والشبان

حنا نقدم والحسيني يدري
ويظهر عليه انه معه نسيان

والمنطقه تحتاج مندوبيه
ساووابنا بعضا من البلدان

عشر مدارس واقعه في المحاني
صادق واسلوا علي بن خضران

والهيئه اللي نفتخر بوجودها
وقت الصلاة تقفل البيبان

وحنا عتيبه كلنا نستنكر
نستنكر التفجير والعدوان

اللي يخاون دولته وبلاده
خاين ولا احد يرحم الخوان

نستنكر الخاين وننكر فعله
هذاك ماله عندنا مكان

من لاخدم دينه وديرته ودولته
تحسب حياته كلها خسران

يقول بن ثعلي وهذي هديتي
مشاعري مشاعر الاخوان

واختم كلامي بالصلاة على النبي
محمد اللي حطم الأوثان

© 2022 - موقع الشعر