بعد بسم الله واعوذ مـن الرجيـم

بعد بسم الله واعوذ من الرجيم
احمد الله واشكره واثني عليه

الوحيد اللي عن الخافي عليم
غافر الزلات رب (ن) نرتجيه

دربنا درب الصراط المستقيم
وكل سلّم با المراجل معتليه

مانظرنا يم زلات السقيم
ولاحسبنا كل خطوات السفيه

نارنا ماهيب ساف(ن) في هشيم
كان شبت كل حي(ن)تشتويه

ولايولع نارها رجل(ن)فهيم
والعقول العاقله ماترتضيه

وكل فارس لويقال انه عظيم
المنايا فى الملاقا تحتريه

ولايبان الفعل من سيف(ن)ثليم
لوتشوف الدم فوقه مغتشيه

ولايجيك الراي من راس (ن)سقيم
ولايباع البوم ولاحد(ن)يشتريه

ولايزود المدح رجال(ن)ذميم
لو على رووس الثريا تلتقيه

ولاتنقص ذمة الخبل الحليم
لو على النمات دايم مقتفيه

ولاتقارن جاهل القوم بحكيم
وكل عاقل في دروبه نقتديه

والمكارم ماتجي غير الكريم
يوم ربي يخذل الوجه الكريه

والعظايم مالها غير العظيم
يرتكي لحمولها لوتحتديه

ولاترافق كود رجال(ن)حشيم
يقصدك ولحاجتك دايم تجيه

كان جا للوقت لوعات(ن)تضيم
يفتديك ان كان طحت وتفتديه

ولايجي لك هافي القاله خصيم
ترفعه في منزل(ن)مالاق فيه

سفهتك للخبل ضربه فى الصميم
مبتلى والله بخلقه مبتليه

ولايجي لك راعي النمه نديم
ولاتحمّل كل شرهاتك عليه

وذي نصايح تنفع العقل السليم
والمجرب مثل عالم اوفقيه