كسابة النوماس

العرف طيب والنوايا براهين
      احدٍ يقدم علم .. واحدٍ يجيبه

وأنا بعد ماغاص فكري بهالحين
      لقيت لي ضمن الذهايب ذهيبه

من سابق الايام وحنا السلاطين ..
     وش اختلف فالوقت حتى نهيبه

والنعم في من يطلقون المساجين
     والمدح عنا كل قافٍ ( صحيبه )

تغنت امجاد العرب بالعثامين
      واليا غبانا فعل ماهي غريبه ..

كل القبايل كاسبين وشجيعين
      وأفعالهم تنذكر وللصيت طيبه

لكن ترا حنا ترانا ( العثامين )
      تاريخنا من يجهله مادرى يبه ..

فكاكة البل من يدين المعادين
      كسابة النوماس طيب وغصيبه

واليا اعتزا الخيال دك الميادين
      واليا وقف للقوم صاب الضريبه

واليا ارتكى للحمل مثل البعارين
      شال الحمول الكايده والصعيبه ..

وجا طاري دبيان وثم قلت نعمين
    يوم ارسلو للذود ومنهو ( يجيبه )

ارسل عليه الجند فيصل وبعدين
     عود بها .. والقوم واخذت نهيبه !