حب الطفولة

مرحبا يأحلى طيوف الذكريات ويا سعدها
مرحبا بأغلى زهور الحب فالقلب امّغروسه

ياسقى الله يوم كنّا اصغار ويديني بيدها
ماخذٍ دور العريس وماخذه دور العروسه

قلبها اللي زارع الذكرى وانا قلبي حصدها
ماحصلّه يستريح البال حتّى في جلوسه

كنت الوم اللي يشوف ان الفراق آمرّ وادّها
لين مادار الزمان و صرت واحد من دروسه

يومها كانت تمنّاني وروحي في جسدها
ليتني طاوعتها واعطيت باري الحب قوسه

احسبن اللي يعز النفس في حبّه وجدها
اثرها سبّة دمار الحب وأول من يحوسه

المكابر قال ماوفّت على شانك وعدْها
والحنين يقول درب الشك رجلك لاتدوسه

ماسلمت من العواذل و الصواديف ونكدها
اه ياحبّن خسرت اجمل لياليه وطقوسه

بري حالي والفراق جروح كيف القى ضمدها
كل ماقلت الجروح تهون قام يحّد موسه

والله إني كل يوم وكل ليله أفتقدها
عقب مافارقتها والقلب مافارق هجوسه

والسنين اللي طواها الوقت ماحلّت عقدها
لو صفت كان الغياب المرّ مادقّت نقوسه

حسبي الله ياقلوبن ماسلمنا من حسدها
احرمتنا ضحكة الايام في دنيا عبوسه