قبرت بداخلي رجال

عليك الله تَرَفّق مابقى شيٍّ ..يسُرّ البال
انا ماعاد في صدري زمن يستاهل اعيشه

اخذت من الهموم اللي يكفيني وشلت جْبال
ومات الحلم في عيني وعزتني مطاريشه

فقدت البارح عيوني قبرت بداخلي رجال
وذيب الوقت ماخلف وراه الا عراميشه

عليك الله لاتبطي ياموت اخاف لاينقال
غدى ذاك الهرم يوُمِي ويلعب كنه الريشه

وتسريبي سواليف المجالس وانكسر بريال
على يدين الرخوم اللي لقت من طيحتي عيشه

عسى الله لايبارك في زمانٍ يقْصُر الفنجال
عن الروس الكبار ويكْرِم الطبال والهيشه

زمانٍ قدم انصاف الرجال وشيَّخ الجهال
وبَدّل فالسلوم وصالت وجالت دراويشه

عليك الله لاتبطي ترى بعض الصبر قتّال
وترى ماينحر الحر النقي ياكود تهميشه