معانق الغيم

ياهود ما متنا من الجوع والضيم
والنفس ماهي من بختها جزوعه

حسب العوايد والشيم والتعاليم
يموت الكريم ولا شكى همْ جوعه

تشوف في عينه معزه وتعظيم
ماكنْ لوعات الليالي تلوعه

يصبر على الشدة عليّ الملازيم
لا طالت الشدات يزداد روعه

في عزته هايم على ماهو يهيم
وتجذبك فزعاته ويعجبك فوعه

كريم نفس معانقٍ غرة الغيم
كذا الكريم إن كان تدرك طبوعه

وإلا البخيل اللي على المال مايقيم
سجيته قشرا ، ويا شين نوعه

ماينفعك لو رحت عنده تهاشيم
اهون عليه يحط فمّه ب كوعه

كذا البخيل إن كان تدرك مفاهيم
يموت البخيل بخيل ما بلْ قوعه