ياهل البيوت اللي على الماء محاظيب
هذي عوايدكم بماضي الليالي
لامنها يبست جلود الدغاليب
كلٍ نزل فوقه وخلا الحلالي
يرعونها الرعيان شرقٍ وتغريب
وليا ورد قدمه عيالٍ بدالي
يعطونه الماء من طويل المجاذيب
من عيهلٍ بين السهل والجبالي
ثلاثة أشهر ثابتين المناسيب
وليا مضا الرابع نوو بالمشالي
البرد حل وزل حر اللواهيب
وشافوا على المنشا طخاف الخيالي
معاد يبقى للمدور معازيب
كلٍ نصا خدٍ من الصيف خالي
ما دفق الشاوي بوسطه مغاريب
من يوم كفوا عنه ماجاه والي
اللي يبا اللامه عوى دونه الذيب
يرجي مع الطرشان رد السؤالي
جاهم من القبله خيالٍ مهاضيب
ملا فياضٍ ما هواه البعالي
على جغبقا حولن السراديب
والعوده الدنيا رقت كل جالي
تلقالهم حول الدعيله مظاريب
لبيوتهم والصلب للبل مفالي
مدهال شقحٍ علقوها الدباديب
دايم هي اللي من توالي الشمالي
ترعى بفرسانٍ تروي المغاليب
لفعالهم بين القبايل مجالي
يرعونها الجبلان كسابة الطيب
أهل بيوتٍ مدهلٍ للرجالي
الجار يلقا زين جانب وترحيب
والضيف يقلط فوق حيلٍ جزالي
وهوماتهم تاصل ديار الأجانيب
يومٍ بالأفعال طامن وعالي
كم جو قومٍ سهجوه المكاسيب
في مال الأقصى يسهجون الموالي
هذا الذي في لابتي من عذاريب
وعندي على ذلك أولاد الحلالي
وصلاة ربي عالم السر والغيب
على الرسول اللي مشى بالعدالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين