بديت البيوت بذكر انا طالبك يالله
تيسر لنا القيفان والنفس ماموره
نبي نصخر القيفان للي نبا ننصاه
عسى ابياتنا تطلع على الكيف مصخوره
وبعدها فلا كل ٍ يزبن لمنهو جاه
ولا كل رجال يبا يحتمي دوره
احد ياصل الهقوه واحد تنتصف هقواه
واحد يخلف الهقوه ولو دق لك زوره
وانا وسط قلبي صاحب ٍ حالف ٍ منساه
رفيق ٍ ليا جا العلم مايعرف البوره
ليا عد فعله ماقفه تطلقه يمناه
على الطيب واهل الطيب يومي بباكوره
كريم وحكيم ودين رب السما بد ّاه
وجريح الزمان يصير طبه ودكتوره
ابوخالد اللي جعل ولد الردي يفداه
ابا اسند عليه العلم يفزع بمذخوره
إلي قصة ٍ حطت بوسط الحشا عرقاه
ابا اشاوره في قصتي واستمع شوره
انا لي عشيرٍ سل حالي سبب فرقاه
كتمت الصواب وحالي اليوم مخطوره
لقيته زمان ٍ فات في رقرق ٍ يرعاه
لقيته وانا قنّاص يمشي بمظهوره
ولفتني جماله غصب سبحان من سو ّاه
ملاك ٍ عطاه الله بالشكل والصوره
وسلمت في دربي ورد وقصر ممشاه
وبدا يختلف مشيه ويغضي بمنظوره
وتذكرت من مشيه وشكله وذير خطاه
جفيل المهاه اللي من الناس مذيوره
توقّفت عن دربي وقلبي يتل اقصاه
غريب ٍ عن اهل الدار والنفس مجبوره
وسألته بعد جيته عن الدار ويش اسماه
وعسى الدار ياهل الدار بالغيث ممطوره
ونظر لي بعين ٍ من نظرها يجر الآه
سهمها ينز ّل قايد القوم عن كوره
وتكلم وقال الدار ماعشت في مرباه
ولاني بعرف اسما صحاريه وقصوره
لكن المطر ممطور ناظر بقايا ماه
وتفر ّ ج بعينك في ظواميه وطيوره
وتكلم كلام ٍ ياحلو منظقه بشفاه
خصوصا ً بعد مابثلي خافي شعوره
وصراحه يبو خالد تعاهدت انا وياه
عهد بيننا بعد ماقسى الوقت لازوره
وتركته بروض ٍ شوفته تنعش اللي جاه
إليا نسناس الهوى فاحت عطوره
جمال الطبيعه يوم اناظر جماله تاه
تفوق الطبيعه وإبنة الناس مستوره
وذكرت العهد واتعبت نفسي وجيت حماه
ولقيت الديار من المخاليق مهجوره
وبديت العصير براس رجم ٍ صعب مبداه
أجر الونين ودمعة العين منثوره
وجلست أتذكّر لين سرحان جر عواه
يجر العوى والجوع يلعب بحنجوره
ولاجاوبه غير الصدى والهوى يقفاه
ورجمي بدت تنعق حناديه ونصوره
وبديت أتفكر وين حكم الزمن ود ّاه
رحل للحجاز ورحت انا لراس تنوره
وترى اخر معالمهم من أهل الكرم والجاه
لهم في زمان ٍ فات وقفات مذكوره
سلايل حصان ٍ طاح خمسين من شلفاه
حكم نجد ياتركي قبل حكم اخو نوره
وانا اليوم يابن العم محتار وين القاه
وتصيتك بقيفانن على الفرخ مسطوره
وأصلي وأسلم عد مزنٍ شمل مسراه
على الهاشمي عداد ما لاح من نوره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين