أسير المشاعر

لـ عبدالرحمن ناهي، ، في غير مصنف، 16، آخر تحديث

أسير المشاعر - عبدالرحمن ناهي

ياماضي الوقت بالله لاتعود وتمر
لافي خيالي تحوم ولاتحط وتزيد

يكفيك اخذت وعطيت ولايهمك امر
اخذت ليل الشقي واخذت ليل السعيد

مديت حبل الاماني وانت ارضك قفر
الا ليامن عطيت دروس ماضي بعيد

من دفتر الذكريات انقول خطر سطر
يامن خذاك الحنين وصرت تنشد نشيد

لااتصير اسير المشاعرلا يضيع العمر
اضرب عليها صليب وعيش يوم جديد

من راح منك تناسى لاتهل العبر
لااتعيش ذكرى حبيب ولاتفتش بريد

لاتلتفت في عشيرن صد والا هجر
احيان بعض المشاعر مثل طوق الحديد

وان كان لاهل الهوى والشوق وجهة نظر
اللي على شوفة الاطلال تكتب قصيد

انقول مهلا قطار العمر ماينتظر
ايسابق الريح في مشيه ولايستعيد

وان لامك الذات لاتندم ولاتعتذر
واتحمل النفس نكبات الزمان العنيد

اتضيع الاحلام مابين الرجا والقدر
الناس ماجاتها الدنيا على ماتريد

افرد جناحك وعانق حاملات المطر
واترك ظلام الحفر للسايبه والطريد

الوقت محسوب والاعمار رحلة سفر
لابد ماتنهي الوجهة ولوهي بعيد

عبدالرحمن الناهي
© 2024 - موقع الشعر