صراع البارحة

الليل يطرب قلب صلفٍ وقاسي
نور القمر وان غاب ناره شعلّها

تشرق عليه الشمس والبال راسي
عقب صراع البارحة مع جملّها

يومٍ يصير القلب رايق وناسي
ويومٍ مع ظروفه .. يجاهد عللّها

احلامه اجمعها بكفي و فاسي
ان ما شتلتْ ، الريح مرْ وشتلّها

وكل ما فتق بضلوع صدري حماسي
أشعر بأن الروح قرّب أجلّها

واخيط صدري .. لا يبين انتكاسي
اخشى على نفسي عواقب زللّها

من دورة الايام ما شاب راسي
وان شاب ذقت اللي مضى من عسلّها

الحزن والضيقه ووجه المأسي
في سلّة ضلوعك اذا جتك شلّها

لا تنحني للوقت .. ما لك مواسي
الناس مشغوله بكثرة .. عملّها

و همك لغير الله احذر تقاسي
وقت الصلاة ان جاء توضى وصلّها

همّك يطيح بسجدتك وانت راسي
لو كانت همومك عظيمٍ جللّها

وبالصف الاول لو تزيد الكراسي
اجزم بأن النصف ماهي لاهلّها !

قناعة الانسان شيٍ اساسي
ان ما وجدها ضيقته ما احتملها