حب ولا هو إعجاب ..

عليك أوله إذا صوتك عليه يا الحبيبه غاب
وأموت بداخلي لا مر يوم وما تلاقينا

عجيبه بها السهوله كيف صرتي أقرب الأحباب
وصارت أجمل اللحظات عندي لا تناجينا

أبعرف وش جمع قلبين كانوا من قريب أغراب
وأبعرف ها الغلا وشلون في لحظه كبر فينا

وأبعرف هو جمعنا حب ولا بس هو إعجاب
وأبعرف آخرة درباً تسابق به خطاوينا

دخيلك علميني ليه فتحتي للشعور أبواب
أنا وقلبي غلقناها من سنين وتناسينا

أنا حالي بدنيا الحب من أول تجربه ما طاب
أنا وقلبي عرفنا الجرح لين أصبح يخاوينا

سألتك ليه أنا بالذات وقلتيلي كثير أسباب
ولا أدري هو صحيح الي حصل ولا تمادينا

أخاف إن الشعور الي جمعنا مخطياً ما صاب
وأخاف إن الألم يصبح مع الأيام شاطينا

أنا لا قلتلك بقوى على الفرقى ترى كذاب
أنا بالحيل ما صدقت ألاقي لغربتي مينا

لعنبو هالشعور شلون خلاني أحسب حساب
أخاف بآخر القصه عذاب الجرح يكوينا

أنا كنت أحسبه قلبي عن دروب المحبه تاب
وش الي رجعّه للدرب ما كفّاه عانينا

تفرق قلبي وعقلي وصاروا والشعور أحزاب
ولا جيت بعقل أحكي يقول القلب هوّينا

أهو من قلة الي من سوات العاطفه منصاب
وش الي قول يجبرنا تدوس الجمر رجلينا

أنا ما عاد بي للحب حيل ولا بقى أعصاب
دخيلك ما أبي أصحى على وقع الألم فينا