كذا خلك .. - سيف بن سالم الغسيني

كذا خلك على جزل العطا لو قابلوك جحود
وسطر لك بها الدنيا مواقف ترفع الهامه

وعوّد نفسك تضحي وتبذل ما تبي مردود
ولا تندم على طيبك وتسمع ناس لوّامه

وجازي الناس بالمعروف، لا تجازي الصدود صدود
ودور عذر لأخطاء الصديق وجنب خصامه

وخلك سمح وأضحك بس حط لكل شي حدود
ولا تتبع هوى نفسك تراها النفس هدامه

وإذا واعدت لا تخلف ولا تنقض فيوم عهود
وجنب دعوة المظلوم، ترى الأيام دوامه

توسع في طموحاتك ترى ما للطموح قيود
وخلك من فئات الي سعى لتحقيق أحلامه

وعيش بدنيتك نافع ولك فيها هدف منشود
وكبّر عقلك فبعض المواقف وأمش قدامه

ترى أعمارنا مهما كبرنا وقتها محدود
خساره في الزعل والكره يضيع العمر وأيامه

وترى بعض البشر تفنى ويبقى ذكرهم موجود
خلقنا كلنا من طين لكن تفرق الخامه

مصير الي على هذا الثرى تحت التراب رقود
دعيت الله يجعلنا من الي يحسن ختامه

© 2024 - موقع الشعر