وضع القرفصاء - صالح السهلي

بديت ابداك لطريق الإنتهاء
وصلت لك واثرك تلوك الحكي لوك

علمتك التفكير وحروف الهجاء
وكافأتني بأول تعابيرك ببوك

يمكن لو انك تمتلك بعض الدهاء
عرفت عني كيف ترمي بالجلوك

عشان تتعلم بوضع القرفصاء
يسهل عليك اتصيب في وضع البروك

يسعد مسا اللي مايعرف من المساء
الا تعاليله على متن المكوك

اكبر من الهقوه على حد الذكاء
واكثر من الاموال في بنك البنوك

بعض السلع تعرض ولا فيها شراء
وبعض السلع تشرى ولافيها صكوك

مالي ومالك .. والشعر جا بإنحناء
يتقمص الصدفه على فكر محبوك

ماقلت لك مالك ومال الببغاء
الله على لسانك يعين امك وابوك

خلك عن اللي طيبته عندك غباء
اللي يجيك بورد وترده بشوك

ابتركك والله يفعل مايشاء
ماني مصدق فكرة الدكتور جوك

هذي ثمان شهور راحت في هباء
يومين في حايل ويومين بتبوك

وإن مرت الأيام واوجست اختفاء
لاتشتكي للشله اللي دهوروك

المشتكى لله في سابع سماء
تعالت اسماءه على كل الملوك

ماعاد هذا وقت جمع الأصدقاء
ولاعاد لك عندي حسن سير وسلوك

مع السلامه يالغباء بن الغباء
ولاني بحاجة صح وَ لافض فوك

© 2023 - موقع الشعر