صلفة الايام

يا صلفة الايام: بالهون بالهون
عن صلفتك عز الله الحال (مِقْدِي)

القلب غادي للتباريح (ماعون)
وخلَّان بالي: (يا وجودي، ووجدي)

والعين مِتْلِفْ طرفها (واسع عيون)
عاثي بها من دون قصدٍ، وعمدي

والوضع- في مجمله- من دون في دون
واليا صفا- صافيه ما هو ب(يمدي)

أركي على (الهقوة) مع اللي يتهقوون
والقى النتيجة: ضاع وقتي، وجهدي

(عوجا، ومنكسرة) على ما يقولون
والحظ الاقشر رافع (انزيم) كبدي

أبدي (أمل) فالمقبلة، واحسِن ظنون
وتخالف ظنوني؛ على غير ما ابدي!

واضحك لها؛ لو ان فالخاطر حزون
واصبر، واصابر؛ والصبر غير مجدي

وادمح، واشيل من الخطا ما يحطُّون
ناسٍ توسَّد قدرهم (كبر عضدي)

من باب: (ذا غالي، وذا شخصٍ يمون)
بذلت؛ والحاصل: مذمة، وجحدي

وانا- حقيقة- بين (داين، ومديون)
افهِق، ولا اتْبِع ما فهقته ب(نشدي)

واوفي، ولي في منهج اللي يوفُّون
قولٍ يبرهن صادقه (فعل زندي)

خضت التجارب يومها سِلْم، وطعون
وثبت في دوراتها- ثبوت جندي

ومن مبدأ:(اما اكون، أوجعل ما اكون)
(القوس انا باريه ، والنرد نردي)

***
ش/ طلال بن عويض بن مصري بن عويلي الضريسي الهجلة المطيري