هذا الفديع اللي ليا كلح الناب - خليل بن هدلان

قصيدة في الشيخ / الفديع بن خليل بن هدلان
 
بديت باسم المعتلي رب الارباب
 
الواحد المعبود منجي دخيله
وافتر للافكار بالصدر دولاب
 
وصخرت عذبات البيوت الجزيله
باسم القروم اللي لهم قدر وحساب
 
اربوعي اللي يحتمون الدبيله
يا مرحبا فيكم شباب واشياب
 
يالطيبين اهل الصفات النبيله
اعداد همال من المزن سكاب
 
واعداد ما تبرق بروق المخيله
في حفل منهو للنواميس كساب
 
شيخ تعلا بالرجوم الطويله
فيه اتنومس عند ربعي والاجناب
 
الهيلعي راع الفعول الجميله
عشاق طيب وللردى دوم حراب
 
يمشي على نهج السلوم الاصيله
هذا الفديع اللي ليا كلح الناب
 
محزم ظفر يا سعد من يلتجي له
ابن خليل الصيرمي زاك الانساب
 
اللي جعل كسب المراجل حصيله
من ينتخي به لا حصل حزم كلاب
 
ياقف بصفه لين يشفي غليله
على ربوعه صاير درع وحجاب
 
من مال حمله بينهم يرتكي له
مثل العسل على القرايب والاصحاب
 
وعلى المعادي كنه الحنظليله
اليا حضر يحسب ويفقد ليا غاب
 
ويوخذ برايه في الامور الجليله
سقت المدايح فيه من قدر واعجاب
 
والمدح يزهى مثله ويستويله
الله يجيره من صواديف الاسباب
 
ويالله عسانا ما اندور بديله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر