الوقت في غيبة المحبوب عيا يمر - عيسى المحبي

الوقت في غيبة المحبوب عيا يمر
لا مر زي الكرام ولا مرور اللئام

واين انت يامطول الغيبات من غيرشر؟
متى تجيب الغنايم والعلوم التمام؟

دورت لك في بلاد الله بحر وبر
وواصلت ليلي بيومي ما اهتنيت المنام

مشيت حافي ولا حسبت برد وحر
لاجلك عصيت الاوامر وانتهكت النظام

واظهرت لك كل سري ماخفى عنك سر
واتعبت فيك المفاصل والركب والعظام

وكل شي منك حلو الطعم لو كان مر
وإذا التقت عيني بعينك يضيع الكلام

بغيت اقلك قمر لكن وايش القمر؟
ماللقمر مثلك انتي ضحكة وابتسام

© 2024 - موقع الشعر