يا وجـودي لا تـذكـرت مـاضيـة العهود - خليل بن هدلان

يا وجودي لا تذكرت ماضية العهود
واعرضت في خاطري ذكرياتٍ غاليه

السنين الاوله ليت يا ناصر تعود
بعد ما شانت ظروف السنين التاليه

لا بغيت ارتاح قامت هواجيسي تزود
ودي اسلى لكن النفس ماهي ساليه

اتذكر ما مضى مع عريبين الجدود
خوةٍ طافت والايام فيها حاليه

كل رجلٍ مثل شرواك بالطيب معدود
دايمٍ نفسه عن الهينه متعاليه

كم سهجنا من فياض وتخاتيخ ونفود
وكم تعلينا بروس الرجوم العاليه

يوم كان الحلم ماله على الدنيا حدود
والصدور من الغرابيل كانت خاليه

ما تعود ذيك الايام يالمجماج كود
من لحود القبر تحيا العظام الباليه

© 2024 - موقع الشعر