الـعـيـد

.العيد عنْدي شوفتك يامنى الرّوح.
لاجيتني والشوق يسكن عيونك

تبني على حبي من أحْساسك صْروح
وتشبّ نار العشْق من ضيّ كونك

يوم المحبة بيننا ضحك ومْزوح
ماعكّرت دنياي طفرة جنونك

كل عام يمضي والمشاعر لك تْنوح
لاجا نهار العيد وأشْرق بدونك

كم لي وانا من سبّت الجرح مطروح
أبكي غيابك واشتكي من ضنونك

ياما عذرتك والخطا صار مدموح
لاذوبت روحي ليالي شجونك

أن جيتني لك بيت الأشْواق مفتوح
تمشي على دربي وتعزف لحونك

وأن غبت عني وأصبح القلب مجروح
جفّت على صدري سحايب مزونك

مالي سوى حبك ولو صار مفضوح
ودي على قلبي اعلّق غصونك

مليت أعاتب وأحرق الصمت بالبوح
لين الجفا ملّك وعاتب طعونك

ماودي أبعد واكتم الهم واروح
دام الأمل يشعل ثواني سكونك

مهما حصل مسموح مسموح مسموح
ببقى على عهدي احبك وصونك

shawqi_alaamri@hotmail.com