تحذّر لا يغشونك - شريدة المعوشرجي

أناادري ماهو كل سهمٍ رميته يب يجي بالصيد
وأنا ادري ما هو بالساهل تحقق منوة عيونك

وأنا ادري ما هو كل يومٍ تعيشه مثل يوم العيد
وأنا ادري ما هو كل ناسٍ تحبهم يب يحبونك

وأنا ادري ما هو كل فارس مثل عنتر، مثل بوزيد
ولا كل شاعرٍ شوقي، تحذر لا يغشونك

ولا منهو عطي مره كريمٍ، يعني بالتأكيد
ولا منهو منع مره عطيّه باخلٍ دونك

ولا من وافقك دايم في رايك بالضروره يفيد
ولا من خالفك أصبح مع اللي يب يضدونك

تحذر من بعض ربعك، عدوك ما هو دوم بعيد
وجربهم على الشده وشوف اللى يفيدونك

يا عبدالله ترى الدنيا متاعٍ باليٍ بيبيد
ولا تركن على عمرك ترى في غفله يخونك

ولا تحسب غني الدنيا يخلي الآدمي اسعيد
مظاهر تبهر الناظر تنبه لا يغرونك

وإذا ضدك زمانك عن وصول اللى تبي وتريد
توجه للي إن عزته أبد ما خيّب ظنونك

توجه للإله اللي إليمنه عطاك يزيد
عسى الله دايمٍ يا وليدي في حفظك وفي عونك

معاني قلت اسطرها، بيوت ابني بها وأشيد
تحصّن في مقاصدها عسى في يوم يحمونك

© 2024 - موقع الشعر