حقيقة - شجاع فهد العجمي

خلاص اليوم لامرسى ولاممسى ولا ميعاد
ولا لهفه ولا بسمه ولا كلمه تواسيني

نويت أمشي طريق خطوته تبدا سهر وسهاد
على جمر الجفا حافي وليل الهجر يطويني

مع شف الشفق راحل نويت أجزع بلا معواد
نويت أطوي شراع كان في ميناك يرسيني

قسى كل القسى بقسى على اللي طاوع الحساد
وقلب فيك ولعني عليك اليوم يقسيني

ثقل دمي ثقل همي ثقل صبري عليك وزاد
ثقل حتى بحر شعري وجرح منك يكويني

أنا مالي على الرمضى هجيرك يالخريف قعاد
سرابك ياظمى عمري أبد ماعاد يرويني

حقيقة كنت لي دنيا وكانت لي معاك أعياد
زمان ماضي ذكراه في قلبي تسليني

وصرت لي اليوم مثل العدو اللي على مرصاد
تحين زلتي وإن كان مازليت تغويني

سماك المظلمه جدبا المشاعر والحصاد عناد
عجزت أفهمك كل اللي لقيته منك يكفيني

© 2022 - موقع الشعر