يا سابقي

يا سابقي كثرت علوم العرب فيكْ
عٌلوم الملوك من أولٍ ثم تاليْ

لا نيب بايع و لا ني بِمهديك
وانا اللي استاهل كلّ غَالي

وانتي من الثلث المحرم ولا اعطيك
وانتي بها الدنيا شريدة حلالي

ياما حَلَى خطوى القلاعَة تباريك
افرح بها الدنيا الصديق المواليْ

وياما حَلَى زين الندى في مواطيك
في عَثْعَثٍ توّه من الوسم سالي

ويا ما حلى شمشولٍ من البدو يتليْكْ
بقفر به الجازي تربّى الغَزَالي

الخير كله نابتٍ في نواصيكْ
وادله ليا راعيت زولك قبالي

بِالضيق لِوجيه المداريع نثنيك
وعَجله وريّضه خلاف التوالي

حقك علّي من البّر أبّديك .
وَعَلى بدنك الجوخَ أحطّه جلالي

أبيه عن برد المشاتي يدفّيك
وبالقيظ احطك في نعيم الظلالي

يا نافدا اللّي حصلك من مجانيك
جابك عقاب الخيل ذيب العيالي

جابك صبي الجُود من كف راعيك
في ساعة تذهل عقول الرجالي

يا سابقي نبي نبعد مشاحيك
والبعد سلم مكرمين السّباليْ

يم الجنوب وديرِتِهِ نِنتِحي فِيك
لربعٍ من الأوناس قفرٍ وخاليْ