طفلة الحب

يا مرحبا يا طفلة الحب واهلين
ياللي على شاني حنانك يجيني

يا ليت منهو صار لرضاك .. بحرين ..
والا بحر واحد .. فداك اقسميني .. !!

اللي ذبحني يا اريش العين شيّين
أحلى الدلع .. معْ هيبتك .. يا ضنيني

وان قلت عن حسنك وسمّيتك الزين
الزين يفخر كلّما قلت : زيني .. !!

وصفك فريد وْ يقسم القلب قسمين
وعْيونك اللي تذبح الحسّ فيني .. !!

عيونك اللي ما ارْتخت للسلاطين
ورْموش تسجد مثلما المسلميني

متناقضه .. مابين كِبْرك وما بين ..
تواضعك .. بالسلهمه كل حيني .. !!

لا مدّت النظره مداها على العين
تتزلزل بْعيني عجايب سنيني .. !!

ما ودّي اوصف ياقي الزين .. تدرين ..
ما ودّي اظلم حجْم زينك بعيني ..

وما ودّي تبحث في خفانا الشياطين
وانّي عليك اخشى من الحاسديني .. !!

لو يا ملاك الشعْر جيتي تنادين
فزّت جيوش الشعْر .. بينك وبيني ..

تنصى هدفها (الموت) .. وانتي تعيشين ..
ويسعدْك ربّي .. كل يوم ٍ يبيني

لا بدّ احبك واكتبك دام للحين
إنتي الأميره .. والشعر محتويني .. !!