شفته مع الصبيان

ماني على ما قيل متسلّي
بعد الذي قد شافته عيني

ولا نيب قايل خلّه يْولّي
ماهوب من طبعي ولا ديني .. !!

لي صاحب ٍ يا جعْله يْشلّي
والا يجنّب علمه الشيني

شفته مع الصبيان في ذلّي
يتبع رداهم والشياطيني

خابرْه رجْل ٍ حر متعلّي
من نسْل قوم ٍ علمهم زيني

والحين تاه وْ ليته يْدلّي
درب المراجل واضح يْبيني

مثل الذي صايم ولا يْصلّي
ما دام يتبع هالملاعيني

ما عاده يْرحّب ولا يْهلّي
وما عاد يسمع لي ويوحيني

اغووه غيّ ٍ ممتلي غلّي
حقد ٍ مدسّس بالشراييني

يا ربّ يا عالم بكل اللي
بالصدْر واللي كان خافيني

يا رب تهدي كل من ظلّي
تهديه يا ربّي وتهديني