القصايد بناتي - سيف الخالدي

ريح الشعر .. يا فوح عُود بْمكسره
لا هبّ ريحك شفت معناك ياتي

يا هالشعر .. يالغيمه اللي ممطره
يامْبعثر ٍ .. قافك يلملم شتاتي

كانك رجل .. حبّيت خشمك واكسره
ايلين تاتيني على أمنياتي

وان كان يا وجه السعد كنتي مَرَه
عز الله ان كل القصايد بناتي .. !!

ماكْثر بنات الفكْر والوصف اخبره
كل العذارى غارن مْن اغنياتي

شيطان شعري لعنبوه آجرجره
وآفجّر بْحور الشعر وسْط ذاتي

شيطاني الأخرس يحب الثرثره
نتّفت انا شاربْه لحظة صلاتي .. !!

من فضّة الإحساس واغلى جوهره
مدّيت حرفين الغلا في وصاتي

في منبر ٍ للشعْر .. ماعْظم منبره
وقّفت .. لي هامه .. وصغت اللغاتي

بعْثرت .. ثم لملمت ذيك البعثره
وازعج بصوت ٍ ما درت به لهاتي .. !!

يا شعْر .. انا عظّمت شانك واذكره
ما كان يوجد من قديم بْحياتي

واثريك بيني معْ جنوني بشْعره
وحدك ترافقني ليوم المماتي

يا شعْر .. ما ظنّك تسمّيت بْمَرَه
بس الغريب ان القصايد .. بناتي .. !!

© 2023 - موقع الشعر