يا مرحبا يا طارش الخير - سعود بن عبدالعزيز الزيد

ابيات للشاعر حمد بن عثمان الكبيسي القحطاني ورد الشاعر سعود الكويتي
 
ياراكبٍ من عندنا فوق وانيت
فرتٍ جديدٍ ماقصر منه الايل
ركّابه الشاطر وانا معه زكيت
خطٍ جميلٍ فيه بدع المثايل
للشاعر اللي فالشعر حظه ابخيت
قصدي الكويتي فالشعر صار طايل
الى اخر القصيده .....
 
رد الكويتي .
 
يا مرحبا يا طارش الخير حييت
أهلاً هلابك عد مازال زايل
 
واعداد ماشافت اعيوني وما اوحيت
واعداد ماهلت امزون المخايل
 
ترحيب من قلبٍ لبيبٍ به اسخيت
لك يا فتى و اللي عطاك الرسايل
 
انا امصدٍ وانت مادري متى جيت
امبكرٍ و الاّ قد الفي مايل
 
طفّ السويك وخف نفسك عن السيت
وْحوّل ولك منا عطايا جزايل
 
ويحرم عليك الروح الاّ تعشيت
ولحضرتك نذبح خروفٍ و حايل
 
وقلطت انا قدام وجهه وشبيت
ضوّي وقدمت العسل له فوايل
 
قال ابغي الرخصه ايلا من تقهويت
قلت اولٍ عطنا العلوم الحصايل
 
قال العلوم ابخطك اللي انت مسيت
فيه العلوم ادقاقها و الجلايل
 
وخذت الكتاب وقمت به واستعديت
ورحت ازهم اللابه ورز الشلايل
 
وجوني اربوعي فازعينٍ سحاريت
عيّال لطامة شبر كل عايل
 
قالوا حضرنا يالكويتي ورديت
عاداتكم يا وافيين الخصايل
 
انتم عصا عزي ليا هزت واوميت
وانتم جمالي ناقلين الثقايل
 
لكن احضروا واخذوا العلم تثبيت
مني وتركوا كل قيلٍ و قايل
 
جاني كتابٍ من صحيبٍ له اهفيت
جميع ماتملك يديني بذايل
 
فان كان مديونٍ فانا لدينه اوفيت
وان كان مضدودٍ فعلنا فعايل
 
وقريت خطك يا حمد واستسريت
لما عرفت القصد زين الدلايل
 
وهانت علي امصيبتي ورجهنيت
وارخصت ربعي كاسبين الجمايل
 
ونا كشفت وحفت مجهد وسعّيت
وبخششت للي ينقلون العمايل
 
حصلت شيخٍ من شيوخ العفاريت
يفهم اعلوم الصايبه و الضلايل
 
قال ابغي البخشيش انا درت والقيت
قصدك وقاسيت البلا و الهوايل
 
حصلت من خده كما مشعل الزيت
مير اذكروا من ماه ترد الهمايل
 
وعرفت قولك يالكبيسي وهزيت
راسي وبدلت الرضى بالزعايل
 
لاواتعبنا راح بين الشماميت
اتصيبنا من مثل هذا فشايل
 
ماينفع المعثوث لو ضرب بفليت
ولاْ ترقع الثياب الحداد السمايل
 
واوٍ فرس له طيرةٍ فالمباييت
الحر منها ما يذوق البلايل
 
ولا تقول اني على المال شحيت
حاضر معك مافيه كتبة حوايل
 
الشره ما يقنص اطيور السرابيت
ولا يثّور في اخشول الفتايل
 
ارع القفر و اشرب قراح الجلاتيت
تعل فوق ولا تجي فالسفايل
 
تعز مثلي قبلك اني تعزيت
وصبرت غصبٍ من افراق الخلايل
 
خليت خلٍ خلني و استخليت
عبثٍ عبث لي من هلي و العوايل
 
و اليوم رحت و راح واقفى وانا اقفيت
ومن بيننا قصت احبال الوصايل
 
ياما عليه اكلفت نفسي وغنيت
واتعبت كتابي بخط السجايل
 
اوصيك لا تشرب من الثبر لظميت
ابيض ويرّث فالكبود العلايل
 
 
الشاعر /سعود بن عبدالعزير الكويتي
© 2024 - موقع الشعر