ياغزال نطحني - سليمان بن شريم

ياغزال نطحني قايد للجميلة
نمرة اول من اول مابعد صار تالي

كل ماجيت ابلقف له واديره بحيله
استدار الهوى عقب الجنوب الشمالي

خابر انّه ربيب بلاد ماينحبي له
واثر مازاد من ولفي يزيده جفالي

ياحلي العنود اللي عيونه كحيلة
علّني من شهد ريق شربته لحالي

ليتني وانت يالغالي سنين طويله
لين تمحا من البيدا رسوم الجبالي

كل ماجيت ابدله عن طويل الجديله
يشفع الحب الاول ثم ينساح بالي

يامحمد قصير الهرج يقطع طويله
والله انّي فلا اسلى عنه دبّ الليالي

ان بغى يضفي الحسنى ويرضي قبيله
يستبيحه ويدمح له الى صار غالي

سالفه قولة ابا انساه والقى بديله
مثل من يرخص النيره ويغلي الريالي

كنّ في عينه اليمنى سيوف صقيله
شرفّوها هل العادات في كل حالي

كن في عينه اليسرى غروس ظليله
زاهيه مع طلوع الشمس ريّ وعدالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر