الفيزياء

الوقت ما يرجع ورا بالفيزياء
بس الحزن يقدر يرجّعنا وراء
 
أنفاسي أسحبها بصعوبة، مختنق
ما احتاج شي مثل احتياجي للهواء
 
غريق والغريق ما هو من عطش
اذا شرب -بكل نهم- جرعات ماء
 
الحرب تبدا لقطع راس الطاغية
يكسبها هو واللي يموت الأبرياء
 
المحكمة صرح انبنى لفرض العدل
أضحى انطلاقة ظلم تحت اسم القضاء
 
كذلك الحب يفترض قوة لنا
مع الأسف خلانا نحيا ضعفاء
 
حبيبتي ودعتها قبل سنة
على أمل لقاء، ويبدو لا لقاء
 
حنا تعذبنا ولكن بؤسها
مدة أقل ما حنا على حدٍّ سواء
 
انا الحطب بالنار وهي عيدانها
مصيرنا واحد وانا اطول بقاء
 
لولاها ما ياصل لكم (اسم عمر)
كتبت فيها شعر ديوان او زهاء
 
قصيدي فيها يعتبر من الغزل
قصيدي فيني يعتبر من الرثاء
 
يعجبها ما اكتب بها ومن ظلمها
ترى نصوصي الباقية كلها هراء
 
ما يستحق هذي الحياة الا فئة
ذوي الأدب -بوجه اخص- الشعراء
 
صنفين احب من البشر (الأدباء
الأول) اما (ثاني صنف الأدباء)