أتشيل فالشرهات مثل المقاضي

لـ فهد المنصوري، ، في الانشاد والشيلات، 30، آخر تحديث

أتشيل فالشرهات مثل المقاضي - فهد المنصوري

مرتني اركاب العتب فالتغاضي
‎اتحث خطوتها • ولا دري على وين

اظنّها راحت تشوف اعتراضي
‎ف عيون من باقي لنا عندهم دين

قولولها ... ماهي بلحية تقاضي
‎انا مسامحهم تراني من الحين

اللي عليّ اخطى بحكمه وقاضي
‎وبعذره الواهي .. مجافيني اسنين

تراه في حِلّن من امره وراضي
‎بسامحه … وعطيه فرصه وثنتين

يمكن بعدها يقتنع بتّعاضي
‎ويرجع على رشده وعقله بعد حين

وادعي له ب دعوت مصلي وواضي
‎مستقبل القبله .. ورافع له ايدين 🤲🏼

يعني على ماقيل خلّك رياضي
‎حاول تعدل بس ف سلوبك الشين

اتشيل ف الشرهات مثل المقاضي
‎والناس يابن الناس ماهم بفاضين

يسايرونك عند كل اعتراضي
‎ويجاملونك في جميع الميادين

زلة رفيقك تنعرب (فعل ماضي)
‎مبني على الفتحه ( وطيب وبعدين )

حدّد لها ف الصدر "عمر افتراضي"
‎عشان لا تبلش بها يا أحمر العين

اللي يطولها .. من الناس فاضي
‎مشقي حياته بالزعل والغثا لين

يمرض . ويلقا ناس مثله مراضي
‎شفهم من (القيلون والضغط) ممسين

خلوا بطاينكم وساعن عراضي
‎ترى الرضا وقعه على انفوسنا زين

#فهد_المنصوري
——————————

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر