رثاء في الملك فهد - سعود الفطيماني

خيم علي الحزن وانضك بالي
وغيري حزين ودمعته فوق الاوجان

وأسال وش الي صار وأنسى سوالي
صعب الجواب تصدقه سمع الاذان

قالوا ملكنا والذرى والزلالي
لرحمة الباري وكل من بها فان

الله يصبرنا على كل حالي
ويجبر عزانا في موادع كحيلان

الموت حق وكلنا للزوالي
محد"جزع والي جزع ناقص أيمان

الحاكم بوصفه شبيه الهلالي
متميز ماخلق باوصافه أنسان

عرف السياسه فيه فوق الخيالي
كل الدول من هيبته تصغي أذعان

طبع كتاب الله واجره ينالي
منفق كثير المال في وجه الاحسان

وأشعل شموع العلم باوسع مجالي
وحزنا الفخر والفضل لله سبحان

وصار السعودي فوق..فوق..العلالي
هيأ له الكايد وعلا له الشان

ويوم العراقي طاش وزاد الخبالي
بجيشه يدك الارض جور وطغيان

مانام له جفن سهير اليالي
لين أنجلى الطاغوت عن قصر دسمان

الفهد..ريف لكبد من جاه جالي
حده صدوف الوقت والحظ له خان

وكم أطفى نار الحرب وهول القتالي
وخلا الدول تمشي على بر الامان

يشهد له التاريخ بفعل الجزالي
أسطورة"تبقى على طول الازمان

والبيعه بايعنا كريم السبالي
جينا كبير وصغير ,بدو وسكان

كامل ووجه الله زهاه الكمالي
عبدالله الضرغام وفي موقفه بان

وولي عهده فيه يكفي المقالي
لوتنشدون الجود قال أسمي سلطان

ونايف يحل معقدات الحبالي
بسياسته عم الامن كل الاوطان

وأميرنا المحبوب وللشعب غالي
سلمان في طرياه كود"وريحان

نور الرياض الي كساه الدلالي
حامي حماها مطوع"كل شيطان

ورأيتنا مرفوعه وثقل الجبالي
ويبقى الوفاء فينا ولامنا خوان

وحنا مع آل سعود أول وتالي
للسلم والاسلام في صد عدوان

© 2024 - موقع الشعر