حمرا الجن - ماجد الزيد الخالدي

ياراكبٍ حمرا من الجن حايل
لادرهمت طشّر زبدها بالاسبال

مضباحها يشدى الرعد بالمخايل
ون دهتها قامت تزرفل تزرفال

ضمرتها ون جيت للقوم جايل
صم الجبال وصابهن منها جفال

وليا لفت بي للربوع الأوايل
هيجنتها وراقت تمايل بسلسال

لا وقفت ضابط يراقب فصايل
وليا اوخدت عطفا تنخّى بالابطال

مرسال من يكمي الخبر بالرسايل
عن العيون الصفر وعقول الارذال

روابعي ذيدان هبس الاصايل
ومفحّلات ضرابهن يشده البال

من راس ابو زيد القريشي شعايل
زرق الشهب وينيشن الشهب ميكال

خليليَّ مُرَّا بي هذيك الثمايل
عسى عليها لايحٍ تالي خيال

مروا لابو تركي زبون الجلايل
زايد وعن قيظ الدهر في وظلال

شيخن وتزهاه البيوت الجزايل
لادرهمن بجلال ولا بلا جلال

دونه بني عمه سيوفن صقايل
وريفه عليهم من قديم ٍ ولا زال

ينصاه من صكت عليه الهوايل
وينكف وهمه جافلن عنه جفال

شيخن كما الهملول بين المخايل
طق بردياته من الجال للجال

غضفر غنضفر سندري الفعايل
جرفاس عفراسٍ ووقفاته جِلال

طلق المحيا وافي بالخصايل
مقدم عرب ومعرب العم والخال

شيخته ماتطلب عليها دلايل
صميدعن زحزيحٍ ناقف له اجلال

براجمه من بينها الخير سايل
كريم سبلا ومدته تشرح البال

فضايله ترجح بسبع الفضايل
ويذبح جزالٍ فوقها دهنا سال

له مجلسن ماصك بابه قوايل
جاك وشلع بابه وخلاه مدهال

مدهال من قلبه تخمه ملايل
والضيم يطرق خاطره وين ماجال

مسقوف جدانه فلاهوب مايل
والضلع اماناته حفظها للاجيال

غوثٍ لملهوف ٍ شعته الغوايل
الضيم شارب له مع الصبح فنجال

المرجلة بين الكواكب تلايل
وزايد عمدها حاشها حوش ريبال

من النقى يفعل وينسى الجمايل
ومن التقى ساعي على خير الاعمال

ضلع ٍ منيف ان زلزلت ماتمايل
وروح الفطيم الطاهرة سمح الاقبال

راعي الضعوف وسقف يتم العوايل
العز بالمسقوف من غير يختال

ختمٍ على ارض الزمن ماتهايل
يوم الدهر صولات وحروب وأهوال

العز وهبة للنفوس الاصايل
ولا وتا الفاضين للقيل والقال

والغانمة ميسا تحب الجزايل
والهزل هزل ويطلب المي باللال

سلام ياشيخٍ زهته المثايل
ولوهي على غيرك تخبخب وهلهال

الضلع من يمناك زبن قبايل
هو العضيد وانت له ابو العيال

ابو زيد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر