وداعي للأخو

لـ ، ، في الرثاء

المنسابة: كُتِبت بمناسبة ذكرى استشهاد الإمام الحسين (عليه السلام)، انتهيت من كتابتها يوم الأربعاء/21/1/2015.

وداعي للأُخو بهاي المسيّه
وداعي يا علي حامي الحميّه
أخويه حسين مظلوم ........ يبويه أحضرنه هليوم
وداعي يا علي حامي الحميه
-------------------------------
آنه زينب آنه بت سيد البريه
لَونْ دهري يچتِّفني سبيه
عُگُب جدّي وعُگُب أُمّي الزجيه
وعُگُب طبرة علي حامي الحميه
يريتك يا علي تشوف الرزيَّه
تعاينّي وأخوتي اعله الوطيَّه
وداعي للأخو من قطعوا الراس ...... وداعي للأخو أنده يعباس
وداعي الثغره ملچوم .......... يبويه أحضرنه هليوم
وداعي يا علي حامي الحميه
-------------------------------
يحيدر خَيمتي اتذكرني بالباب
تذكِّرني ابوديعه بليلة مصاب
يبويه هم صعب من تُفگد احباب
والاصعب من تشوف بجسمه الخضاب
أصُب دمعه اعله دمعه وأبدي العتاب
وأقبِّل صدره واسجد فوگ التراب
وداعي للأخو والمُهره عطشان ....... وداعي للأخو اللِّي بصدره قرآن
وداعي وگلبي مهموم .......... يبويه أحضرنه هليوم
وداعي يا علي حامي الحميه
-------------------------------
سمعتك يل گُمر طايح تعنِّيت
يخويه اللِّي حصل اعثر مِن امشيت
اعاين عينك ولچفوفك ابچيت
سُكينه تگلَّك ارجع يلِّ وفِّيت
اجيتك يل ابد ما ظنَّك انسيت
نساء وعايله عطشانه بَقِّيت
وداعي للأخو لمگطّع چفوف .... وداعي للأخو الجِّسمه امتله سيوف
وداعي وأرتجي أيگوم .......... يبويه أحضرنه هليوم
وداعي يا علي حامي الحميه
-------------------------------
وِگع سبط النبي وأتغير الحال
بعد عِزّ وخِدر گادوني بحبال
شفت خيمه احركوه وبيه اطفال
واشوف اعله الثره اجساد الابطال
تركت المصطفى ودم سبطه السّال
يعاين راسه لن فوگ القنا انشال
وداعي للأخو الرَّاسه على أرماح ...... وداعي للأخو مِنِّ المِسك فاح
وداعي الذبحته الگوم .......... يبويه أحضرنه هليوم
وداعي يا علي حامي الحميه
-------------------------------
ادور أبكربله عنّ أخوتي وين
گِظوا فوگ التُرب وأبلايه تكفين
كفيلي يم نهر وابلايه جَفّين
واعاين لَنْ سَهم نابت على العين
بُگيت آنه وحَرَم ننظُر للحسين
صريع ويفتدي دَم نحره للدين
وداعي للأخو من سحگته الخيل ...... وداعي للأخو مِن چَلچل الليل
وداعي الجسمه مهشوم .......... يبويه أحضرنه هليوم
وداعي يا علي حامي الحميه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر