مملكة النّمل

مو كلِّ العقل لأهل العقل زينه
نَمله ابلا عَقل بس بالعلم حيره

مملكة النّمل ما ظنه بيه احزاب
مو مجلس يديره، النّمله التديره

مو كلمن غيور وللوطن يفديه
اكو ابصمته ويذبّح للوطن غَيره

ما يذكر شَهيد وامّه تنظر ليه
من شافت ضِناه ايودّع الدّيره

عَين اعله الدرب بس الاذن عالباب
تُنطر يا وكت تستبشر ابخيره

ما يرجع بعد في ذمةِ الله
طِفل عادل زِلم بالفزعه والغِيره

هذا ابن الجنوب المايهدّ الگاع
هذا ابن النجف والكوفه والحيره

هذا ابن الأسد واللي دفن عباس
هذا ابن الجبايش هذا بن بصره

هذا ابني الطلع والموت اجه وياه
يا موت اتركه خذني آنه الچبيره

ما يرجع مُحب لو يشهگ التّابوت
لو تدفع ذهب مو تدفع الليره

يالشّابع خبز، بالصحره نص الليل
ما يشبع طفل بالخبزه الزغيره

هم شايف چفن يشبُگ رضيع ابيوم
مره ابكربلاء وصارت اكثيره