قم ياطلال إكتب لعمك ارساله
إكتب على القرطاس وإحذر ميلها
إكتب لأبن "مشّيب" سنام الشكاله
ووضّح "لبو غازي" حروفي وقلها
قله ترا ماني براعي جهاله
أعرف سلوم القوم وأدّراخملها
أحذر من الزلات في كل قاله
من خوف لايمسك عليّه زللها
من خلقتي محدٍ ذكرني بعاله
ولا والله أعرف حيلةٍ من حيلها
أمشي على وضح النقا بأعتداله
وأعرف ميول الناس وأعرف عدلها
والرجل يا "مقعد" لسانه عقاله
إليا عقل ملزوم باللي عقلها
وأنا سطرّت القاف وأنقا جزاله
في مدح من يمناه ينطف عسلها
عون الرفيق اللي لفاه وشكاله
من عقب مادنياه درّهم جملها
مما جراله برّكت به جماله
ومنولٍ جلّ الثقايل حملها
ماقدّ شكا للناس سيّات حاله
مغنيه ربي يوم ناره شعلها
*****
ياواثقٍ بالمال مسّرع زواله
يزول جلّ المال يبقا عملها
محدٍ ضمن دنياه لوّ كان ماله
كثّر الجنان المثمرات بنخلها
المال والأعمار تقفي رحاله
وتبقا فعولٍ طيباتٍ لأهلها
وياسعد منهو طيباتٍ فعاله
يذكر مع الأجواد باللي فعلها
ون قسمت الأذكار قسمه يناله
بافعاله اللي بالمكارم شملها
ون ذكرت الأجواد يذكر لحاله
حيثه زما رأس المعزّه نزلها
*****
واعود للي سمّ حالي سؤاله
وخطرٍ على رجلي يجيها شللها
من عقب ماأوحيته يفسّر مثاله
ويعاف حدّ السيف يبغا بدلها
اللي طرالي غير واللي طراله
لبّس يدين الريم فاني حلّلها
فكّره شطحّ لبعيد باللي بداله
وصوّر تصاويرٍ لنفسه فصلها
*****
وكلٍ يبا الأرباح في رأس ماله
محدٍ يداري في التجارة عللها
المشترا والبيع حلّل حلاله
وحرّم على المسلم يرابي هللها
لزّمٍ على المسلم يربي عياله
من ماله الطيّب ويبني فللها
ما فالربا طيّب ولا طاب فاله
من يوكل عياله زوايد غللها
*****
ياعمّ قلبي زاد فيه إشتعاله
من عقب ما أوحيتك تفنّد مثلها
وتفسّر الأبيات هاقن مياله
وخليت حدّ السيف يفني جزلها
والله رفيع الشان منشي خياله
منبت ابوسط الفيافي نفلها
الواحد اللي كل خلقه تساله
عالم خفيّات النوايا وأجلها
إني فلالي مقصدٍ بالرساله
غير الوفا للي عطاني فحلها
من بعد ماقلبي تضارس محاله
جيته وعني شال حامي مللها
وصلاة ربي عدّ ماأمطر هماله
وعدّ الجراد وعدّ ساعي نحلها
واعداد مابدر ظهر في كماله
على نبي شال عنّا جهلها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين