مانيب تباع الحلوم الجفوله

مانيب تبّاع الحلوم الجفوله
اللي توردني سراب المحيمين

وان كان وقتي قام يقرع طبوله
والاحي طروقه وانا خاطري شين

عذلت نفسٍ مالحقها عذوله
من نايد العربان والربع الادنين

وانا على شف الرفيق وميوله
اللي يصافيني على الشين والزين

لابارك الله فاليمين الختوله
اللي مساعيها لجل تفرض البين

من هان ابن عمه نفته الرجوله
لو كان تضحك له وجيه المعادين

ولو يحصل فالمجالس قبوله
واهل الشعر لجله تصوغ الدواوين

واللي دفع للشر حق العموله
لابد مايقضي المشاريه بالدين