عنود الصبايا

ليه خنتي هوانا يا عنود الصبايا
بعد هاك الغلا والحب والمقدريّه

عِشرة العمر راحت من جنونك شظايا
ما بقى في مدار الحب منها شظيّه

ضاعت بْحلم ليلٍ ما بقى له بقايا
وانتهينا وكل راح يتبع نويّه

لكن الوضع ما يحتاج كُثر الحكايا
والعذايل بقلبي ما لها قابليّه

مير لو تجذبك لمعة بريق المرايا
ما تجي بالحقيقه والحقيقه خفيّه

وقبل ما الحب تعصف به سهوم المنايا
آه يا خوف مسفر تصبحين الضحيّه

اولتها جروح وتاليتها كوايا
واخر العمر تقفي به سهوم المنيّه

طال عمري وانا اخفي في فوادي خفايا
وشاعة السالفه غصبٍ عليك وْ عليّه

ولو عندي خبر عن ما تكن النوايا
كان باحتاط للي ناويٍ لي بنيّه

واول العام انا فارس واقوّد السرايا
واخر العمر حارس عند باب السريّه

مير مهما حصل لي يا عنود الصبايا
والله اني لاموت وْلا تموت الحميّه