يفضل راجح هو القاتل في رثاء الشهيد محمود البنا

لـ ، ، في الرثاء

المنسابة: في رثاء شهيد الشهامة محمود البنا الذي قُتل بسبب رفاعه عن بنت تعرضت إلى التحرش من قاتله محمد راجح الحارثي

يلا يا قلم اكتب من تاني
أصل الظلم في حلقي مرارة
أوعاك تسكت حتى ثواني
الحق في بلدي جات له إعارة
قتلوا الشاب الحيلة الطيب
سجنوا القاتل بيحاسبوه
ولما الصوت العالي هيهدى
يطلع وبكده يبقوا حموه
حودة استشهد علشان شهم
قابل ربه بيحمي العرض
قتله جبان في حماية الأم
هترش فلوس وتقدم عرض
والواد راجح مهما بيعمل
كله بتمنه حتى إن ظلم
سيبوا الواد يتحرش يقتل
ويدوا عروض في مقابل الدم
دنيا وماشية بالمقلوب
يموت الشهم ويحيا السافل
فيها الحق ضعيف مغلوب
يدفن فارس يحمي القاتل
حتى الحق إن ضاع أو غاب
ربك شاهد عالي وعادل
لو يحكمنا قانون الغاب
يفضل راجح هو القاتل
حكم يطمن المستهتر
اتحرش واقتل أي نفوس
بملايين أهلك بكره هتقدر
تطلع بخسارة بس فلوس
إزاي نرضي بدفن رجولة
وتحيا الخسة جوه ديوث
ومحمود كان القصة الأولى
وراجح ع الغلبان هيدوس
دمك يا إبني هيفضل يصرخ
لرب في إيده حياة أو موت
يرد الحق وظلمك يرضخ
حتى إن صاب الكل سكوت

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر