دبلة كبد

لوغابت الشمس بنظر. مغليك شمسك ماتغيب
يبقى ضياك امنور الدنيا ولو... طال الغياب

ياللي خفوقي في بعادك غادي ٍ كنه عطيب
ارحم رحمك اللي بيديه المغفره يوم الحساب

بعيونك اسرح بالغموض اللي به الموقف .. رهيب
( رحلت ذهاب) بنظرتك وبغيبتك ( رحلة اياب)

دايم انادي ! بصرختي واقول : انا ؛ هل ؟ من مجيب
واسمع صداي يقول: امرك يا منادي مستجاب

بعيد عن عيني ولكنك .. على قلبي قريب
حلمي حقيقه والمصيبه !! شوفتك صارت سراب

اذا تركتك ( منتحر) واذا تمنيتك ( صويب)
واذا تناسيتك ( كدر) واذا تحديتك ( عذاب )

الله عطاك بدنيتك ياملهمي اوفى... حبيب
والله عطاني بدنيتي .. هم وتعاسه واكتئاب

ياوش : رمابي في دروبك والهوى طبعه .. عجيب
لاجيت ابفتح باب في دربي .. يفقل الف باب

شقا,, ود بلة كبد,, وآهات ,, وجروح ,, وقطع صيب
عايش ولاني عايش ٍ مابين ناب وبين ناب

هم يوديني هنا و هناك و هنيا يجيب
ولاجابني هنيا هنا و هناك وداني وجاب

الظن مهما خاب من حلم الاماني مايخيب
والدمع مايجدي ابد .. لا صار ! ماينفع عتاب

ماتدري ان الدار تشكي من توٌجاد الغريب
وان الغريب ينوح يشكي من .. معاناة الغياب

تجمل بوصلك .. ترى الخفاق من جورك عطيب
وثلج المحبه من لهيب الصد يالمدعوج .. ذاب

سيطرت واستيسرت بعيونك وبالثغر الذويب
بالعين ( سر السيطره ) والثغر( رمزالانسكاب )

يابو اشفاه ٍ كنها .. متوهجه مثل اللهيب
ويلاه من جمر الشفايف تفقد العقل الصواب

لاهي خمر ولا عسل ولا بتوت ولا حليب
خلقه الاهيه بديعه .. ذقت انا منها شراب

جدايلك يالاشقراني .. تجعل المنظر مريب
جدايل ٍ منها سواد الليل ونجومه تهاب

صوتك يغذ يني فديتك ,, غن لي يالعندليب
ارقص وغن وجر صوتك .. ود ني فوق السحاب

ماني بحبك واعشقك .. يالترف يالغرو اللبيب
منساب فيك ومهتوي / لأقصى حدود الانسياب

لو كان لجروح الهوى .. دكتور يعالج او طبيب
ما كان نسمع عن حكاية كل عاشق في كتاب

وان افترقنا جعل جرح ٍ من فراقك مايطيب
وش عاد يبقى ذكريات ان رحت ياذرب الجناب

ابسال المولى عسى ( في يوم ) @ يجمعنا النصيب
وانت انتظرني او تعال لصوبي وسوق الركاب

الى متى ؟ هذا السؤال ؟؟ .. الوقت عيا لا يجيب
الى متى ؟؟؟ اسأل واعيش العمر لاجل اسمع جواب

هل ؟ القدر ! يصبح لنا الحاجز ويسقينا النحيب؟
او الامل ! يصبح لنا نور ٍ ولا يبقى ضباب

الشمس لو غابت فلا يمكن .. ابد شمسك تغيب
انت الضيا وانت القدر حتى لو ان النور غاب