الرفاقة

حي الكتاب اللي من القلب ساقه
ساقه عميل شاطر بالتماثيل

خط لفى احرق ضميري حراقه
كدر علي وصار دمعي هماليل

يالايمي بعطيك عني بطاقه
من قبل لاتأخذ ولا تحط وتشيل

بطاقة فيها حبال الوثاقه
من شدها بيشد حبل المواصيل

فيها موازين تزيد العلاقه
ماهيب تبخس كاسبين المحاصيل

الصاحب اللي فيه عز وطلاقه
افخر بمعرفته وشوقي مراسيل

ويخبره شوقي ترى القلب شاقه
ليل التسامر والطرب والتعاليل

ونموت ماننسى ليالي الصداقه
وافين ماننسى فعول الرجاجيل

وان كان قصرنا بحق الرفاقه
ولانشدنا ياوسيع المداهيل

ماهوب والله يارفيقي حماقه
ولاهوب ياذرب اليماني تجاهيل

لكن رفيقك قاسي الوقت عاقه
الين شاف من الشدايد تهاويل

ضاقت عليه وصار نومه شفاقه
يسري به الهوجاس ويساهر الليل

تواردت مع كل باب وطاقه
ازريت اعدلها عن الضلع والميل

اسارق الضحكة لقلبي سراقه
واجامل الجلاس لو فيني الويل

وامشي مع العالم بلطف ولباقه
اخاف يدري عن خفاي المهابيل

اللي سوالفهم تجيك بطفاقه
ماجربوا كثر العنا والولاويل

هذي علومي جلها والدقاقه
ارسلتهالك يالخوي بالتفاصيل

وارجي فرج دنيايا عقب انغلاقه
والله يجعلها علينا تساهيل

واختامهاواعداد ماسيق ناقه
يوم النحر واعداد كثر التهاليل

ازكى الصلاة معطرة وسط باقه
على محمد عد وبل المخاييل

بوحي
في 1441/5/10هجريه