يــا فــارج الشــدات

يالله يا منشي بروق المخاييل
يا غافر الزلات يا خير منشود

يا مدبر المخلوق جيل(ن) بثر جيل
يا فارج الشدات يا خير معبود

يارب يا رزاق عجز(ن) مراميل
تفتح لنا باب(ن) من الخير ممدود

وتجعل لنا من مد جودك محاصيل
انت الكريم وبيدك الرزق مقدود

تفكنا من شر سود الغرابيل
وتفكنا من شر حاسد ومحسود

اللي على الغرات يرسل مراسيل
لا مدارين حظه ولا خاف منقود

هاذي حياة ٍ كل بوها بهاذيل
تجامل المخلوق والقلب ملهود

ما يدله الانسان كثر الأزاويل
لا صار دايم عن هوى النفس مردود

يا ما صبرنا يابو صالح على الميل
نصبر وعند الله فرج كل مظهود

الحر لا لفت عليه المحابيل
عاف الرفيق وبدل الحوم بركود

اشوف ناس(ن) عايشه بالتهاويل
تضحك بوجهك والبلا قلبوها سود

وابا الحصين يذلل الذيب تذليل
وسبع الخلا قدامه الباب مسدود

تم الكلام وزبدة الهرج تقليل
هذا الصحيح وكل مطرود مصيود

وصلاة ربي عد مزن الهماليل
على رسول(ن) ثبت الحق بشهود