يامل قلبٍ فيه مثل الوقيده
صالي سناها يسعر الجاش ويميع
من قو لاهبها تذوب الحديده
تجزع مقاليط الرجال البواتيع
عنيد لكن الليالي عنيده
ابني مشاريعٍ وتهدم مشاريع
نريد والله يفعل اللي يريده
وشهب الليالي واقفتلي على الريع
قامت تخبط القلب خبط اللبيده
تغلظ وانا ماني كثير التجازيع
من شافني يقول وشذا الوليده
وانا زماني له عليّه تهازيع
نشف لدمي وايبسه في وريده
ودق الحشا دق الصفا بالفواريع
لي قصةٍ ما ترجمتها قصيده
لاهب لضاها مزع الجوف تمزيع
تصعب تخيلها العقول الرشيده
اللي تحل معقدات المواضيع
من جورها ما تحتملها بديده
وإلها تشوّك روس كل الرواضيع
يعلم بها الخالق وتجهل عبيده
والسر خيطٍ والخلايق قواطيع
تسعالها روس الردا والنقيده
اهل الهروج مكثرين الزوابيع
اللي مع الجره مغيره معيده
وترب ديان الخلي البلاقيع
والذيب ذمه ما ينقّص رصيده
يرقا عن التفاق عسر المطاليع
ما ياصله زوم النفوس البليده
اللي على زلات الانفس مطاميع
تعلا النشاما بالخصال الحميده
واهل الخطايا في خطاهم مدانيع
وكم من عضيدٍٍ علته من عضيده
وكم نايدٍ مبعد كثير التنافيع
وخف من عدوك مرةٍ مستكيده
وخف من صديقك بالشهر والاسابيع
وموت الفتى بالمرهفات الحديده
اخير من صبره على الذل والتيع
والرجل تطلعه الضروف الشديده
والا الرخا كلٍ يشوح المراميع
والفقر مزلاج الفعول المجيده
والناس تفرق مثل فرق الاصابيع
والعمر فاني والليالي مديده
والذنب عاشق والخطايا مفاريع

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين