مثـل الشعر يازين حبل المواصيل ,, - خالد بن سهيل العبيريد

ياقلبي اصبر واليالي مقابيل
نور الفرج لابد يقبل شعاعه

ريح عسى تفداك كل المهابيل
ريح ترا دنياك لهو ومتاعه

هاذي ثلاث اسنين مهموم واشيل
ماعاد لي للهم زود استطاعه

راحت حياتي بين هم وغرابيل
ان طعتني ياقلب كب اللكاعه

والاانت ياراع الرموش المظاليل
مركب هوانا مال جنبه شراعه

مثل الشعر يازين حبل المواصيل
وكثر التغلي ساعي ٍ بأنقطاعه

وان كان قصدك في هوايه تعاليل
قلب الشقا وش لك تسبب ضياعه

لجلك تحمّلت العنا وأسهر الليل
أدافع العبرات ساعه بساعه

حبك هدم حيلي ولاعاد بي حيل
تصنع هروج الشوق عندي صناعه

كنت احسب انك ماتطيع العواذيل
وأثرك للعذال سمع ٍ وطاعه

خلاص مايحتاج عرف وتحاليل
مادام جمر الهجر زاد بولاعه

روّح ولاترجي نديب المراسيل
عندي من اللي مآيبيني مناعه

© 2024 - موقع الشعر