الجروح المستجدة

ماهتك ستر الصدور الاّ الجروح المستجده
ولايضيّق بالنفوس الاّ الزمان ابو العجايب

والبحر لو يستثير الناس في جزره ومده
صدره الواسع تذوب بْوسطه اسرار الحبايب

وياوجودي كل ما سلّمت راسي للمخده
واستلمني مشغل التفكير غصب بلاسبايب

وقمت اعدّ اللي يضيّق خاطري لاقمت اعدّه
من ضياع الحلم وجروح الأحبّه والقرايب

واختصم قلبي وعقلي فالدروب المجرهدّه
وقمت اصلّح بينهم عقب الدعاوي والطلايب

قانعٍ من وقتي اللي للحزن صدري يحدّه
ومومنٍ بانّ العطايا من كرم جزل الوهايب

ومايطيب لمثلي الاّ لقمته من كَسْب يدّه
ولا ضميت الاّ هطول الغيث من غرّ السحايب

ولا حتزمت الاّ بعزمٍ مايبيح الوقت سده
ولاعرفت السَلْوه الاّ مع نسانيس الهبايب

ابدويٍ مايرخّص سلم ابوه وسلم جده
لين ترخص في عيون البادية عوص النجايب

ومن بنا بيت الشموخ بٍيده لايمكن يهده
لو يشوف الموت في دربه ركز روس النصايب

وياعنود الصيد صدري واصل من الشوق حده
وانتي اغلى من عرفته يابعد شقر الذوايب

اقبلي مثل السحاب اللي ينوش القاع خده
باردٍ يطفي بِماه المنسكب جمر اللهايب

وعالجي جرح المُودّ اللي حفظ قدر الموده
واحفظيه مْن العيون الشامته حاضر وغايب

وان بدا لك شي غير اللي معاليقي توده
حكّمي قلبك وعقلك والبشر مخطي وصايب

لاتجين اقسى عليّ مْن الجروح المستجده
ولاتخليني ضحيّه للزمان ابو العجايب