دنيا غريبه

شابت بي الدنيا ومن جورها شبت
كم شيبت قبلي كثيرالرجالي

قمت اتذكر.. واكثر الوقت به كبت
والميل ما تصبر عليه الجمالي

دنيا غريبه ..أدبتني وانا تبت
واهتلت في بعض الامور الثقالي

دنيا عجيبه شفت منها وجربت
شفت العجايب مع مرور الليالي

شخص ٍ يعكر صفوة النفس لو طبت
وشخص ٍ يجامل بالرفيق الموالي

وشخص ٍ يدور بالخفا كل ما غبت
يشهر علوم ٍ ما لها اول وتالي

وشخص ٍ اليا جيته به الطيب رحبت
قدم ادلاله وآخر العلم غالي

من اول ٍ في دنيتي ما تهيبت
لا شك مال الوقت .. والوقت مالي

بينت في بعض المواضيع واعربت
وذكرت شي ٍ عابر ٍ وسط بالي