السوق يجمع بين شاري وبايع
ولاينفع أهل الكار فكر ٍجويّع
واللي يبي من نادرات البضايع
لي هاجس لعسر القوافي مطيّع
لقيت من كثر التجارب نفايع
وخاويت من علمه من الجود ذيّع
وأبعدت عن درب النفوس الدنايع
وجنبت ناس ٍ بالعوايد تضيّع
الطيب مبدا والمراجل طمايع
ومن لاجمعهن في حياته مضيّع
اضرب على الكايد بوقت الفزايع
وحذراك تبقى بين ربعك دنيّع
خلك حليم وخل عندك طلايع
من قبل يشمت في مطيحك وضيّع
اللي على الشده قوي البتايع
مايتقي لو كان حظه يليّع
واللي خذل وصلك بكبر وقطايع
يمسي بيوم ٍ من فعوله فجيّع
واللي قضى عمره بكذب وخدايع
عقله لنزغات الشياطين طيّع
الشعر يبقى له مع الناس ذايع
وياكم شاعر فيه جار وتهيّع
وجزل القوافي تالي الوقت ضايع
متى على الله نبت شعره ينيع
الناس تفرق بالشيم والطبايع
خلك على ماقيل صدرك وسيّع
نعيش بالدنيا سواة الودايع
يوم ٍ تفرحنا ويوم ٍتشيّع

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
الوقت المطلوب للقراءة
دقيقة و 53 ثانية
الزيارات

20
© 2019 - موقع الشعر - بواسطة شركة المبرمجين