قمت اتذكر والصور زادت بكاي - خالد بن عبدالعزيز التميمي

سلام ياوقت بدت فيه دنياي
ذيك السنين اللي بها البال رايق

ماكنت احسب حساب لايم وحكاي
ومانمت ليلة والفؤاد متضايق

وماكنت اسولف عن ردى الحظ شكاي
وماكان عايقني عن الضحك عايق

تمرني عجلات الأيام برضاي
ويسوقها عن لذة الوقت سايق

لذايذ عدت وانا اسابق خطاي
ماذقت حلوات الليالي الرقايق

ماكنت اظن اني بعود بممشاي
وتبين في عيني جميع الحقايق

كنت احسب ان البال للوقت نساي
وعن ماضي الأيام ماهوب فايق

اثر الزمن يكتب مع العمر ذكراي
ويسجل احداث العمر بالدقايق

من يوم شاف اني مخاوي لمركاي
قام وفتح عندي قديم الوثايق

شي دفنه الوقت بالروح جواي
من يوم شفته شب قلبي حرايق

قمت اتذكر والصور زادت بكاي
فيها الحنين اللي ملته الشهايق

زود الحسايف جابت ادناي واقصاي
واصبحت من عقب التحساف ضايق

على زمان راح ماعاد هو جاي
لوطاح فوق الأرض سبع الطبايق

لكن عزاي اصبر على حر بلواي
وادعي عساي اصبح على الصبر طايق

خالد
في 1440/10/23هجري

© 2024 - موقع الشعر