البندقية

بالرغم من تحدثي عدة لغات
بأيامي هذي ماني بحاجة لغه

ساكت أزجّي وقتي بالتأملات
أدرس واحلّل مجريات الأدمغه

للبندقية هيبة تهز الثبات
حتى لو انها من الذخيرة مفرغه

النحل طيب أصل ينتج طيبات
بس لا رماه قليّل العقل لْدغه

وأنا المفوّه لو دعيت المفردات
إغاثتي بالشعر يا شعري صغه

قصيدي اللي يشبه لضحك البنات
وقعه على الآذان مثل الدغدغه

لكن عجزت القى لمن حولي صفات
جيوب مليانة عقولٍ فارغه

من اللي أعطاهم إذن بالانفلات؟
من اللي شرّع للجهل؟ من سوّغه؟

أكبر عقوبة: جمْعك اضداد الذوات
مثلاً: مناقشة الغبي للنابغه

لا النابغة يرضى بنزول الدرجات
ولا الغبي قادر على انه يبلغه

يا ليتني برّا فصيل الكائنات
صادق بها ما اقولها مبالغه

يا ليتني غصن اصفر بحقل النبات
تمرّه الأغنام جوعى وتمضغه