طير الهوى - مسفر جمعان الصفا

الغالي اللي عليّه شحّ بالنظره
بعد الغلا والمودّه غيّر اطباعه

من حقي اعاتبه فالحب واتشره
ما دام حبه بقلبي قرّ مرباعه

طير الهوى في معاليقي بنى وكره
باقصى المضانين مسباره وميقاعه

راحت حياتي وعمري كلها بامره
يامر وينهى واقول السمع والطاعه

من سبته كن في قلب الصفا جمره
والروح من لوعة الحرمان ملتاعه

والعين لا من ذكرته هلّت العبره
عبرة حزن نارها بالقلب ولاّعه

والى طلبت المواجه قال لي بكره
وقام يْتمطّع وانا ما اقوى تمطّاعه

وْلا من نوى بي يبور مْجهزٍ عذره
يْحط القضا والقدر والحظ شمّاعه

وان جاه مني خطا يموت ما يغفره
في كل وقتٍ يذيعه لي بمذياعه

ياقوّ قلبه على الفرقا ويا صبره
بذّات لامن غلب جده تدلاعه

ما يحسب حْساب لا جيره ولا عِشْره
وان قلت باقنّعه يا مصعب اقناعه

لكن عندي امل واحد في العشره
ما يبيع من يشتري حبه ولا باعه

واقول لعلها ما تطوّل السفره
وعيني ترقّب عقب غيبته مرجاعه

وديني اقابله فالعمر لو مرّه
ساعه من الليل والا اقل من ساعه

وان جمّل الوقت معه وطالت السهره
وشمّيت من زهر يشمومه ونعناعه

شرحت له حبي اللي مخفيٍ سره
وبيّنت له جرحي اللي زوّد اوجاعه

ومهما تطول الليالي ما انكشف ستره
وعواصف الغدر ما هبّت على شْراعه

مااحب غيره ولا اقدّر بشر قدره
خذ وحده مْن الغلا ثلاثة ارباعه

تاج الحلا عن جميع الغيد محتكره
سبحان من في جماله يذهل ابداعه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر