تركت الهوى

تركت الهوى الله لا يعوده ولا طاريه
ولا دْروبه اللي تعبت بمشيها اقدامي

تعذّبت بدروبه ومرّه غلب حاليه
وصدّرت عن جمّه وانا جايع وْضامي

وردته وانا اهني به القلب وامنّيه
وماتت على جمّه ظماء زهرة ايامي

جرحني وجرحه ما له اعلاجٍ يْداويه
ولا لي جدى الا عظتي راس الابهامي

وجودي وجود الغالي اللي فقد غاليه
عليه اصدروا فالمحكمة حكم الاعدامي

ملبّس بظلم ولا لقى عذرٍ يبرّيه
ولا حال من دونه مْداعي ولا مْحامي

على عمري اللي ضاع بين الجهل والتيه
وطويت سجلاته على ذنوب واثامي

خدعني زمان الغي وانا احسب اني بيه
وخسرت مشاريعي وضاعن الاحلامي

غدى راس مالي قبل ما الربح منه اجنيه
وصارت لاماني كلها اوهام فاوهامي

اداري على سرّه قبل ينكشف خافيه
وظميته بْقلبي وفي داخل عْضامي

وعُوده سراب وْلا يفيد الهنا راعيه
ومن طاح يبطي من عثايره ما قامي

تركته عسى الله لا يرده ولا طاريه
ولا دروبه اللي تعبت بمشيها اقدامي

وانا استغفر الله من ذنوبي واتوب اليه
واساله عظيم الشان يعفو عن اثامي