من تجاهلني تجاهلته

ياهجوس الشعر هاتي ياهجوس الشعر ودّي
قبل ما ذيب المشاعر بالحشا يجذب قنيبه

هاتي العلم الصحيح وهاتي الراي المسدّي
كل عرفٍ يبهج الخاطر وقلبي يهتنيبه

شاعرٍ واحشم جناب الشعر في مزحي وجدّي
لان له عند وقار وْقدر واجلالٍ وهيبه

غصت ببحور القصيد وعارفٍ جزري ومدّي
ولا اهضم حْقوق الرجال اللي مواقفهم صعيبه

وان دعاني داعي الميقاف حاضر مستعدّي
ما انثنى عزمي ولا ارضى بالهزيعه والغليبه

من تحداني تحديته وانا قد التحدّي
اعرف اشن الهجوم الشرس واقود الكتيبه

ومن تجاهلني تجاهلته ولو ما هوْ بودّي
لكن اجازيه بافعاله على خبثه وطيبه

ومن نوى درب الجميل ومد يدينه ليَدّي
يبشر بجزل القصيد اللي تماثيله عجيبه

ويبشر بعلمٍ ينومس من تسمّع له ولدّي
له عليّ حقٍ مصيب اكرم مقامه واحتفيبه

اعرف حْقوق الرجال ودون واجبهم ما اصدّي
الرجال فعولها توجب لها حقوقٍ مصيبه

كل رجلٍ له مقام وكل علمٍ له مردّي
والشهامه والشكاله عزوة الروس الصليبه

وقبل ذا يهمل حبال الود والاخر يشدّي
للوفي جمر الغلا بالقلب ما صرّم لهيبه

واحمد الله معْ رجال المعرفه ما خاب كدّي
لجلهم باصخّر القاف المجمّل واعتنيبه

في يدي سيف البيان وللملاء ما باح سدّي
والا سيف المعركه في كف ابو مسلم قتيبه