اخاف لويعمل لدمي تحاليل

تدللي يا باشة الغيد تدليل
لو تطلبين عيوني اقول سمّي

يالذتي بعد العنا والغرابيل
وْ ياراحتي لا بعثر الوقت همّي

من غيرك ارجي فالسنين المقابيل
ان كان حظي عن مراميك زمّي

لك في خفوقي يا حياتي مداهيل
من باب لذاتي الى باب غمّي

غنّيت لك من هيض شعري مواويل
وظمّيت حبك داخل الروح ظمّي

وصنتك وبا اصونك عن القال والقيل
وْ باادراك من كلمة نمومٍ ينمّي

اشفق على طاريك واهواك بالحيل
وْما ابغي حدٍ يلحْقك سبٍ وذمّي

وْمن زايد الغيره وكتم التفاصيل
وْلا ينكشف سر الغرام المهمّي

اخاف لو يعمل لدمي تحاليل
يبين حبك في تحالي دمّي

واقصى منى شاعرك يا روعة الجيل
ان اللقاء بك يا حياتي يتمّي

واقضي معك من باقي العمر لو ليل
واشم ريحك ياجمل الطيب شمّي

وانسيك لوعات الهوى والبهاذيل
واسقيك عذب الحب من نبع جمّي

واشعل على رْجوم الفراق القناديل
فرحة عمر او سمّها اللي تسمّي

لكن ما ادري وش بقايا المحاصيل
وْ لا كل شيءٍ بالتمني يتمّي

وان كان دار الكيف بالبن والهيل
وْلا لدّت عْيونك والاشواق يمّي

وش عاد لو اسرجّت لك سُبّق الخيل
والا اعتزيت بسيف خالي وعمّي

ما تمسح دموع الهيام المناديل
ولا تبري الذكرى العذاب المطمي